News
«ព្រះមហាក្សត្រនៃព្រះរាជាណាកច្រកម្ពុជា ព្រះអង្គសព្វព្រះរាជហឫទ័យស្ដេចយាងចូលរួមពិធីលៀងសាយភោជ នាវិមានសភាប្រជាជនចិន តបតាមសេចក្តីក្រាបបង្គំទូលថ្វាយសូមយាងរបស់ ឯកឧត្តម សុី ជីនភីង ប្រធានាធិបតី នៃសាធារណរដ្ឋប្រជាមានិតចិន...»
កាលពីវេលាថ្ងៃទី៣០ ខែកញ្ញា ឆ្នាំ២០១៨ ព្រះករុណាជាអម្ចាស់ជីវិតលើត្បូង ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជាជាទីគោរពសក្ការៈដ៏ខ្ពង់ខ្ពស់បំផុត ព្រះអង្គបានសព្វព្រះរាជហឫទ័យស្ដេចយាងចូលរួមពិធីលៀងសាយភោជ នាវិមានសភាប្រជាជនចិន តបតាមសេចក្តីក្រាបបង្គំទូលថ្វាយសូមយាងរបស់ ឯកឧត្តម សុី ជីនភីង ប្រធានាធិបតី នៃសាធារណរដ្ឋប្រជាមានិតចិន ក្នុងឱកាសអបអរសាទរទិវាបុណ្យជាតិខួបលើកទី ៦៩ ឆ្នាំ នៃសាធារណរដ្ឋប្រជាមានិតចិន(១៩៤៩-២០១៨)។
ប្រភព៖ ទំព័រហ្វេសបុក ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី
RAC Media ស៊ាង រ៉ូហ្សាត
ថ្ងៃអង្គារ ទី២ ខែតុលា ឆ្នាំ២០១៨
បើយោងតាមការផ្សាយព័ត៌មានរបស់ ភ្នំពេញប៉ុស្តិ៍ នៅថ្ងៃទី១ ខែតុលា ឆ្នាំ២០១៨ គឺកម្ពុជាគ្រោងនឹងបើកស្ថានឯកអគ្គរាជទូតរបស់ខ្លួននៅក្នុងប្រទេសចំនួន២ទៀតនៅឆ្នាំ ២០១៩ខាងមុខគឺនៅសាធារណរដ្ឋតួកគី និងនៅប្រទេសប៊ុលហ្គារី ដើម្បីពង្រឹងកិច្ចសហប្រតិបត្តិការជាមួយប្រទេសទាំងនោះ។
បើយោងតាមព័ត៌មានវាយោចេញផ្សាយនៅថ្ងៃទី១ ខែ តុលា ឆ្នាំ២០១៨ គឺការគ្រោងបើកទូតនៅប្រទេសប៊ុលហ្គារី ត្រូវបានលោកនាយករដ្ឋមន្ត្រីហ៊ុន សែនលើកឡើងក្នុងជំនួបពិភាក្សាការងារជាមួយលោកប៊ួយកូ បូរីសូវ (BoykoBorissov) នាយករដ្ឋមន្ត្រីប៊ុលហ្គារីកាលពីថ្ងៃទី២៨ ខែកញ្ញាក្នុងឱកាសដែលប្រមុខរាជរដ្ឋាភិបាលកម្ពុជា អញ្ជើញចូលរួមមហាសន្និបាតអង្គការសហប្រជាជាតិលើកទី៧៣នាទីក្រុងញ៉ូវយ៉ក សហរដ្ឋអាម៉េរិកហើយប្រមុខ រដ្ឋាភិបាលនៃប្រទេសទាំងពីរបានឯកភាពគ្នាក្នុងការបន្តពង្រឹង ពង្រីកទំនាក់ទំនង កិច្ចសហប្រតិបត្តិការនៃប្រទេសទាំងពីរឱ្យកាន់តែរឹងមាំទ្វេឡើងថែមទៀតទាំងក្នុងវិស័យសេដ្ឋកិច្ច វិនិយោគ ពាណិជ្ជកម្ម និងទេសចរណ៍។
យោងតាមសេចក្ដីប្រកាសព័ត៌មានរបស់ក្រសួងការបរទេស និងកិច្ចសហប្រតិបត្តិការអន្តរជាតិ ដែលចេញផ្សាយនៅរសៀលថ្ងៃទី២៨ ខែកញ្ញា ឆ្នាំ២០១៨ព្រះរាជាណាចក្រកម្ពុជានឹងបើកស្ថានឯកអគ្គរាជទូតរបស់ខ្លួន នៅរដ្ឋធានីអង់ការ៉ា ប្រទេសតួកគី ក្នុងឆ្នាំ២០១៩។នៅក្នុងសេចក្តីប្រកាសព័ត៌មានក៏បានឱ្យដឹងបន្ថែមថាប្រមុខការទូតកម្ពុជានឹងពិភាក្សាអំពីកិច្ចការសហការគ្នារវាងវិទ្យាស្ថានជាតិការទូត និងទំនាក់ទំនាក់អន្តរជាតិ និងសាលាការទូតរបស់តួកគីផងដែរ៕
ដកស្រង់៖ សេចក្ដីប្រកាសព័ត៌មានរបស់ក្រសួងការបរទេស និងកិច្ចសហប្រតិបត្តិការអន្តរជាតិ ភ្នំពេញប៉ុស្តិ៍និង វាយោ
RAC Media | ផាញ់ សារឿន
ថ្ងៃអង្គារ ទី២ ខែតុលា ឆ្នាំ២០១៨
(សៀមរាប)៖ នៅរយៈពេល៩ខែ ឆ្នាំ២០១៨នេះកម្ពុជាទទួលបានចំនួន ៨៥,៥៧៩,៥២៣ដុល្លារ ពីការលក់បណ្ណចូលទស្សនារមណីយដ្ឋានអង្គរ កើតឡើង១៣ភាគរយ បើធៀបនឹងរយៈពេលដូចគ្ កាលពីឆ្នាំ២០១៧។នេះតាមរបាយការណ៍ផ្លូវការរបស់គ្រឹះស្ថានអង្គរដែលRAC Media ទើបទទួលបាននៅព្រឹកថ្ងៃទី០១ ខែតុលានេះ។
របាយការណ៍បញ្ជាក់ថានៅរយៈពេល៩ខែចាប់ពីខែមករា ដល់ កញ្ញា ឆ្នាំ២០១៨ ភ្ញៀវទេសចរបរទេសចំនួន ១៩០១៥៦៩នាក់បានទិញបណ្ណចូលទស្សនាអង្គរ កើនឡើង៨.៤៧ភាគរយ។ក្នុងចំនួនចំណូលដែលទទួលបានជាង៨៥លានដុល្លារនេះ រាជរដ្ឋាភិបាលកម្ពុជាបានដកចំនួន៣,៨០៣,១៣៨ដុល្លារឧបត្ថម្ភចូលមន្ទីរពេទ្យគន្ធបុប្ផា ដើម្បីទ្រទ្រង់ដំណើរការពិនិត្យនិងព្យាបាលកុមារកម្ពុជា។
សូមជម្រាបថា បណ្ណចូលទស្សនាតំបន់អង្គរត្រូវបានបែងចែកជា៣ប្រភេទ៖
*ប្រភេទប័ណ្ណចូលទស្សនា១ថ្ងៃ មានតម្លៃ ៣៧ដុល្លារ។
*ប្រភេទប័ណ្ណចូលទស្សនា៣ថ្ងៃ មានតម្លៃ ៦២ដុល្លារ និងមានសុពលភាព១០ថ្ងៃ។
*ប្រភេទបណ្ណចូលទស្សនា៧ថ្ងៃ មានតម្លៃ ៧២ដុល្លារ និងមានសុពលភាព០១ខែ៕
ប្រភព៖គ្រឹះស្ថានអង្គរ
RAC Media | ហេង សុភី
ថ្ងៃអង្គារ ទី២ ខែតុលា ឆ្នាំ២០១៨
យោងតាមការផ្សាយព័ត៌មានរបស់ភ្នំពេញប៉ុស្តិ៍ ថាមានអ្នកទោសចំនួន៣១៩នាក់នឹងត្រូវលោកនាយករដ្ឋមន្ត្រី ហ៊ុន សែន ស្នើសុំលើកលែងទោសនិងបន្ធូរបន្ថយទោសក្នុងឱកាសបុណ្យភ្ជុំបិណ្ឌខាងមុខនេះតាមគោលការណ៍មនុស្សធម៌របស់លោក ខណៈអតីតតំណាងរាស្ត្របក្សប្រឆាំងស្នើឱ្យលើកលែងអ្នកជាប់ឃុំដោយសារនិន្នាការនយោបាយជាអាទិភាព។លោកនាយករដ្ឋមន្ត្រី ហ៊ុន សែន បានថ្លែងទៅកាន់អ្នកគាំទ្រលោកនៅអាមេរិកថា៖«ឆ្នាំនេះខ្ញុំចង់ឱ្យមានការលើកលែងទោសដោយទ្រង់ទ្រាយធំមួយនៅពេលភ្ជុំនៅពេលបុណ្យឯករាជ្យនិងនៅពេលខួប២០ឆ្នាំនៃការបញ្ចប់សង្គ្រាមស៊ីវិលរបស់កម្ពុជា។ក្រសួងមហាផ្ទៃនិងក្រសួងយុត្តិធម៌កំពុងតែពិនិត្យករណីនេះហើយ»។
លោក ជិន ម៉ាលីន អ្នកនាំពាក្យក្រសួងយុត្តិធម៌បានប្រាប់កាលពីម្សិលមិញដែរថាការស្នើសុំលើកលែង និងបន្ធូរបន្ថយទោសសម្រាប់បុណ្យភ្ជុំបិណ្ឌនេះមានសរុប៣១៩នាក់ក្នុងនោះមានស្ត្រីចំនួន១៣៣នាក់។ប៉ុន្តែលោកបានបញ្ជាក់ថា ចំនួនដែលទទួលបានការលើកលែង ឬ បន្ធូរបន្ថយទោសជាក់ស្តែងគឺ អាស្រ័យលើការវាយតម្លៃរបស់គណៈកម្មការ។លោកបន្ថែមថាការលើកលែងទោសនេះក៏ផ្អែកលើគោលការណ៍ច្បាស់ផងដែររួមមានការកែប្រែខ្លួនក្នុងពន្ធនាគារតាម រយៈការវាយតម្លៃពីពន្ធនាគារពីគណៈកម្មការថ្នាក់ខេត្តដល់ថ្នាក់ជាតិនិងរយៈពេលនៃការអនុវត្តទោសដូចជា អ្នកអនុ វត្តទោសបាន១ភាគ៣នឹងទទួលបានការបន្ធូរបន្ថយទោស ហើយអ្នកអនុវត្តមាន២ភាគ៣ ទទួលបានការលើកលែងទោស។
លោកថា ចំនួននិងឈ្មោះអ្នកទោសដែលទទួលបានការលើកលែង និងបន្ធូរបន្ថយនឹងត្រូវបង្ហាញឲ្យឃើញតាមព្រះរាជក្រឹត្យ៕
ដកស្រង់៖ ភ្នំពេញប៉ុស្តិ៍
RAC Media | ផាញ់ សារឿន
បច្ចុប្បន្នអត្រានៃប្រជាជនពេញវ័យ ដែលប្រើប្រាស់សេវាហិរញ្ញវត្ថុនេះមានការកើនឡើងខ្ពស់ រហូតដល់៦៧% បើធៀបកាលពីមុនមានត្រឹមក្រោម១០%ប៉ុណ្ណោះ។នេះបើយោងតាមការលើកឡើងរបស់លោក ជា ចាន់តូ អគ្គទេសា ភិបាលធនាគារជាតិនៃកម្ពុជា ក្នុងជំនួបរវាងសមាគមនាវាយុវជនអាស៊ីអាគ្នេយ៍កម្ពុជា-ជប៉ុនលើកទី៤៥។
លោកជា ចាន់តូ បានឱ្យយដឹងថា បច្ចុប្បន្នវិស័យមីក្រូហិរញ្ញវត្ថុនៅកម្ពុជា បានកំពុងរួមចំណែកកាត់បន្ថយភាពក្រីក្រ និងលើកស្ទួយជីវភាពរបស់ពលរដ្ឋ ហើយការកើនឡើងជាលំដាប់នេះ បានឆ្លុះបញ្ចាំងតាមរយៈកំណើននៃប្រជាជនពេញវ័យកំពុងប្រើប្រាស់សេវាហិរញ្ញវត្ថុ។បន្តទៀតថា វិស័យមីក្រូហិរញ្ញវត្ថុកំពុងរីកចម្រើន ដោយក្នុងនោះទ្រព្យសកម្មក្នុងវិស័យនេះកើនរហូតដល់១៤% នៃទ្រព្យសកម្មរបស់គ្រឹះស្ថានធនាគារ ឥណទានបានកើនដល់១៩,២% នៃឥណទានគ្រឹះស្ថានធនាគារ និងប្រាក់បញ្ញើកើនដល់១១,១ភាគរយ នៃប្រាក់បញ្ញើគ្រឹះស្ថានធនាគារ។ លោកក៏បានបញ្ជាក់ទៀតថា កំណើនរហូតដល់៦៧% នៃការប្រើប្រាស់សេវាហិរញ្ញវត្ថុ របស់ប្រជាជនពេញវ័យនៅកម្ពុជានេះ មានការកើនឡើងខ្ពស់មែនទែន បើធៀបនឹង រយៈពេលដូចគ្នាកាលពី១ទសវត្សរ៍កន្លងទៅ ដែលមានត្រឹមតែក្រោម១០%ប៉ុណ្ណោះ។លើសពីនេះកំណើនប្រជាជនកំពុងប្រើប្រាស់សេវាហិរញ្ញវត្ថុក៏ឆ្លុះបញ្ចាំងពីកម្រិតនៃការយល់ដឹងរស់ពលរដ្ឋមកលើវិស័យនេះ។
គួរបញ្ជាក់ថា វិស័យមីក្រូហិរញ្ញវត្ថុបានផ្ដល់ឥណទាន ដល់ប្រជាជនចំនួន១,៨លាននាក់ និងមានអ្នកដាក់ប្រាក់បញ្ញើ១,៦លាននាក់ ព្រមទាំងបានផ្ដល់ការងារដល់ប្រជាជន៣ម៉ឺននាក់ ហើយឥណទានរបស់មីក្រូហិរញ្ញវត្ថុ បានផ្ដល់ទៅលើវិស័យសេដ្ឋកិច្ចនានារួមមាន៖ វិស័យកសិកម្ម៣០%, ក្រុមគ្រួ សារ៣០.៥%, វិស័យពាណិជ្ជកម្ម១៨,៨%, វិស័យសេវាកម្ម១០% និងវិស័យផ្សេងៗទៀត១០ % ផងដែរ៕
ប្រភព៖ Vayo FM
RAC Media | ហេង សុភី
សេចក្តីជូនដំណឹង៖ ស្តីពីការកែសម្រួលខ្សែរត់រថយន្តក្រុងចាស់ និងបន្ថែមបណ្ដាញខ្សែរត់ថ្មីរបស់រដ្ឋាករស្វយ័តដឹកជញ្ជូនសាធារណៈរថយន្តក្រុង(City Bus) រាជធានីភ្នំពេញ។ស្វែងយល់ពីស្លាកសំគាល់រថយន្តក្រុងតាមខ្សែ នីមួយៗទាំង១៣ ខ្សែ ដែលរដ្ឋាករនឹងដាក់ឱ្យដំណើរនៅថ្ងៃទី ០១ ខែតុលា ឆ្នាំ២០១៨។
ប្រភព: រដ្ឋាករស្វយ័តដឹកជញ្ជូនសាធារណ:រថយន្តក្រុង-city bus RAC Media | ហេង សុភី
ក្រសួងសុខាភិបាលនឹងចាប់ផ្ដើមអនុវត្តវិធានការច្បាប់ ពិន័យអ្នកជក់បារី និងម្ចាស់ភោជនីយដ្ឋានឆាប់ៗខាងមុខនេះ ក្រោយពីមើលឃើញពីអត្រាអ្នកស្លាប់ដោយសារការជក់បារីក្នុង១ឆ្នាំៗមានការកើនឡើង និងការ ចំណាយថវិកាយ៉ាងច្រើនលើការព្យាបាលជំងឺ។ នេះបើយោងតាមការបញ្ជាក់របស់លោក អ៊ឹង ភីរុន រដ្ឋលេខាធិការ ក្រសួងសុខាភិបាលក្នុងសិក្ខាសាលា ស្ដីពីការអនុវត្តច្បាប់ និងលិខិតបទដ្ឋានគតិយុត្តិនានា ស្ដីពីការត្រួតពិនិត្យផលិតផលថ្នាំជក់កាលពីថ្ងៃទី២៧ ខែកញ្ញា កន្លងទៅនេះ។
ថ្ងៃអាទិត្យ ទី៣០ ខែកញ្ញា ឆ្នាំ២០១៨
អាជ្ញាធរខេត្តកំពង់ឆ្នាំងនឹងចាប់ផ្តើមបម្លាស់ទីផ្ទះបណ្តែតទឹករបស់ជនជាតិវៀតណាម ជិត១ពាន់គ្រួសារ នៅក្នុងក្រុងកំពង់ឆ្នាំង ឱ្យមករស់នៅលើគោកវិញឱ្យអស់ត្រឹមចុងឆ្នាំនេះ។នេះបើតាមការចុះផ្សាយរបស់វិបសាយក្រសួងព័ត៌មាន កាលពីថ្ងៃទី២៤ ខែកញ្ញា ឆ្នាំ២០១៨។វិបសាយនេះ បានដកស្រង់សម្តីលោក ស៊ុន សុវណ្ណរិទ្ធ អភិបាលរងខេត្តកំពង់ឆ្នាំង ឱ្យដឹងថា កាលពីថ្ងៃទី២៤ ខែកញ្ញា អាជ្ញាធរខេត្ត បានផ្សព្វផ្សាយសេចក្តីជូនដំណឹងពីផែនការខាងលើនេះ ដល់ប្រជាពលរដ្ឋ ដែលកំពុងរស់នៅលើផ្ទះបណ្តែតទឹកក្នុងទន្លេ ដើម្បីចូលរួមអនុវត្តផែនការ៥ឆ្នាំរបស់ខេត្តឱ្យទទួលបានជោគជ័យ។
ផែនការនេះ គឺត្រូវអនុវត្ត ពីឆ្នាំ២០១៥ ដល់ ២០១៩។លោកបន្តថា នៅក្នុងផែនការនេះ អាជ្ញាធរខេត្ត បានបង្កើតគណៈកម្មការ ៦ក្រុម គឺក្រុមទី១ ដឹកនាំដោយលោកផ្ទាល់ ធ្វើបម្លាស់ទីផ្ទះបណ្តែតទឹក នៅក្នុងក្រុងកំពង់ឆ្នាំង ឱ្យឡើងមករស់នៅលើគោកវិញ ឱ្យអស់នៅចុងឆ្នាំ២០១៨នេះ ។ ចំណែក ៥ក្រុមទៀត គឺមានលោកស្នងការនគរបាលខេត្តជាប្រធាន និងអភិបាលស្រុកពាក់ព័ន្ធ ជាអនុប្រធាន ដោយត្រូវធ្វើការបម្លាស់ទីផ្ទះបណ្តែតទឹកទាំងអស់ ដែលមានទាំងវៀតណាម ទាំងខ្មែរ និងទាំងខ្មែរឥស្លាមមានចំនួនជាង ២ពាន់គ្រួសារ នៅតាមស្រុកក្នុងខេត្តកំពង់ឆ្នាំង ឱ្យឡើងមករស់នៅលើគោកទាំងអស់នៅក្នុងឆ្នាំ២០១៩។ ក្នុងនោះ ជាង២ពាន់គ្រួសារ បានផ្តិតមេដៃយល់ព្រមរួចហើយ ហើយអាជ្ញាធរខេត្ត ក៏បានបញ្ជូនមេដៃទាំងនោះ ជូនប្រមុខរាជរដ្ឋាភិបាលរួចហើយដែរ។បើតាមលោកអភិបាលរងខេត្ត នៅក្រុងកំពង់ឆ្នាំងនេះ មានផ្ទះបណ្ដែតទឹករបស់ជនជាតិវៀតណាមចំនួន ៩៩៦គ្រួសារ ដែលត្រូវបម្លាស់ទីឱ្យឡើងមករស់នៅលើគោក លើដីទំហំជាង ៤០ហិកតា ក្នុងឃុំស្វាយជ្រុំ ស្រុករលាប្អៀរ។
អាជ្ញាធរខេត្ត បានធ្វើគម្រោង សុំអនុប្រយោគពីរាជរដ្ឋាភិបាលសុំកាត់ដីនេះ ចេញពីតំបន់ដីលិចទឹក។គួររំលឹកដែរថា កាលពីព្រឹកថ្ងៃទី២៧កញ្ញាម្សិលមិញនេះ អាជ្ញាធរខេត្តកំពង់ឆ្នាំង បានធ្វើពិធីក្រុងពាលីសុំសេចក្តីសុខ ខណៈដែលអាជ្ញាធរត្រៀមរៀបចំគម្រោងធ្វើការបម្លាស់ទីផ្ទះបណ្តែតទឹកនេះ។លោក ឈួរ ច័ន្ទឌឿន អភិបាលខេត្តកំពង់ឆ្នាំង បានថ្លែងក្នុងពិធីនេះថា គម្រោងបម្លាស់ទីផ្ទះបណ្តែតទឹកនេះ ធ្វើឡើងដើម្បីធានាបាននូវបរិស្ថាន និងសោភ័ណភាពនៅតាមដងទន្លេនៃភូមិសាស្រ្តខេត្តកំពង់ឆ្នាំង៕
ប្រភព: ខ្លីខ្លីRAC
Media | ហេង សុភី
ថ្ងៃអាទិត្យ ទី៣០ ខែកញ្ញា ឆ្នាំ២០១៨
(កំពង់ធំ)៖ ដើម្បីលើកស្ទួយវិស័យកសិកម្ម តាមរយៈការអនុវត្តផលិតកម្មកសិកម្មតាមកិច្ចសន្យាឱ្យបានប្រសើរឡើង និងមានលក្ខណៈស្តង់ដារ ក្នុងការផលិតអង្ករនាំចេញ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រម៉ាញ់ និង នេសាទ ចុះត្រួតពិនិត្យមើលដំណើរការ នៃសង្វាក់ផលិតកម្មផលិតអង្ករ របស់ក្រុមហ៊ុន អេមរុរ៉ាយស៍ (Amru Rice) ស្ថិតនៅភូមិបុសវែង ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ដែលមានហេដ្ឋារចនាសម្ព័ន្ធ ពាក់ដោយប្រព័ន្ធកុំព្យូទ័រទំនើបៗចុងក្រោយ តាមស្តង់ដារនៃខ្សែចង្វាក់ផលិតកម្មស្រូវ មុនធ្វើការលក់ចេញទាំងនៅក្នុងស្រុក និងនាំចេញទៅក្រៅប្រទេស។
ក្នុងដំណើរចុះពិនិត្យនៅថ្ងៃទី២៩ ខែកញ្ញា ឆ្នាំ២០១៨នេះ ដែលអមដំណើរដោយលោក សុខ លូ អភិបាលខេត្តកំពង់ធំនោះ លោក វេង សាខុន បានសម្តែងនូវសេចក្តីរីករាយ និងវាយតម្លៃខ្ពស់ ចំពោះសមិទ្ធិផលដ៏ល្អប្រសើរដែលក្រុមហ៊ុនសម្រេចបាន។លោករដ្ឋមន្ដ្រី បានគូសបញ្ជាក់ថា សមិទ្ធផលទាំងអស់នេះលេចចេញដោយសារតែ ការធ្វើកំណែទម្រង់ដ៏សមស្របនៃវិស័យកសិកម្ម ស្របជាមួយគោលនយោបាយដ៏ត្រឹមត្រូវ និងឆ្លាតវៃបំផុតពីប្រមុខរាជរដ្ឋាភិបាលកម្ពុជា។ ជាពិសេស ការធ្វើទំនើបកម្មកសិកម្ម និងការប្រែក្លាយប្រជាកសិករទៅជា កសិ-ពាណិជ្ជករ គឺជាគន្លឹះដ៏សំខាន់ក្នុងការអភិវឌ្ឍវិស័យកសិកម្ម និងជួយគាំទ្រដល់គោលនយោបាយរបស់រាជរដ្ឋាភិបាលកម្ពុជា ដើម្បីធ្វើឱ្យសម្រេចបាននូវចក្ខុវិស័យ ក្នុងការប្រែក្លាយប្រទេសជាតិទៅជាប្រទេសដែលមានចំណូលមធ្យមកម្រិតខ្ពស់ នាឆ្នាំ២០៣០។បន្ថែមពីនេះ លោក វេង សាខុន ជំរុញឱ្យយក្រុមហ៊ុនពង្រីកការសហការជាមួយ ប្រជាកសិករតាមរយៈយន្តការអនុវត្ដផលិតកម្ម កសិកម្មតាមកិច្ចសន្យា ឱ្យកាន់តែទូលំទូលាយ ដោយជួយគាំទ្រដលប្រជាកសិករ ដូចជាការផ្តល់ពូជសុទ្ធ ការគាំទ្រលើផ្នែកបច្ចេកទេសនិងបច្ចេកវិទ្យាថ្មីទំនើប ជាពិសេសការប្រើប្រាស់ គ្រឿងយន្តកសិកម្មដើម្បីលើកស្ទួយកម្រិតជីវភាពរបស់ពួកគាត់ និងសំណូមពរដល់ប្រជាកសិករទាំងអស់ឱ្យចងក្រងជាសហគមន៍កសិករ ក្នុងការផលិតស្រូវឲ្យមានលក្ខណៈស្តង់ដារបច្ចកទេសដើម្បីនាំចេញទៅទីផ្សារអន្តរជាតិ។
យោងតាមការរាយការណ៍របស់ក្រុមហ៊ុន Amru Rice បានឱ្យដឹងថា ក្រុមហ៊ុនបានប្រមូលផ្តុំស្រូវ ដែលផ្គត់ផ្គង់ដោយ សហគមន៍ តាមរយៈផលិតកម្មកសិកម្ម តាមកិច្ចសន្យា ហើយក៏ជាកន្លែងចុងក្រោយនៃខ្សែចង្វាក់ផលិតកម្មស្រូវ មុនធ្វើការលក់ចេញទាំងនៅក្នុងស្រុក និងនាំចេញទៅក្រៅប្រទេស។អ្វីដែលគួរជាទីមោទនៈនោះ បច្ចុប្បន្នទូទាំងប្រទេស ក្រុមហ៊ុនបានអនុវត្តផលិតកម្មកសិកម្មដំណាំស្រូវជាមួយ៤៧សហគមន៍ក្នុងខេត្តគោលដៅចំនួន៧ ដូចជាខេត្តព្រះវិហារ ខេត្តកំពង់ឆ្នាំង ខេត្តកំពង់ស្ពឺ ខេត្តតាកែវ ខេត្តបាត់ដំបង ខេត្តកំពង់ចាម និងខេត្តកំពង់ធំ ហើយបានបង្កើនការងារជូន ៦,២៤២គ្រួសារ លើផ្ទៃដីសរុប ១៨,៨៩១ហត ដើម្បីផលិតស្រូវប្រមាណជា ៥២,៤៧៦តោនសម្រាប់កែច្នៃនិងផ្គត់ផ្គង់ទៅទីផ្សារក្នុងស្រុក និងនាំចេញ។ទន្ទឹមនឹងនេះហេដ្ឋារចនាសម្ព័ន្ធ ដូចជាឃ្លាំងស្តុកស្រូវ ដែលបានសាងសង់អស់ជាង៨០ម៉ឺនដុល្លារ និងមានលទ្ធភាពស្តុកទុកស្រូវបានជាង៦ម៉ឺនតោនក្នុង១រដូវកាល។ដោយឡែក ចំពោះឡសម្ងួតវិញ គឺអាចសម្ងួតបានជាង១,៦០០តោនក្នុងមួយថ្ងៃ។
សរុបពីការវិនិយោគ គឺក្រុមហ៊ុនបានចំណាយថវិកា អស់ប្រមាណ៩លានដុល្លារ ដែលក្នុងនោះក៏មានការចូលរួមផ្តល់កម្ចីឥណទានពីធនាគារអភិវឌ្ឍន៍ជនបទរបស់រាជរដ្ឋាភិបាលផងដែរ៕
ប្រភព: Fresh News
RAC Media | ហេង សុភី
ថ្ងៃអាទិត្យ ទី៣០ ខែកញ្ញា ឆ្នាំ២០១៨
ប្រមុខដឹកនាំក្រសួងទេសចរណ៍ ថោង ខុន៖ កម្ពុជាកំពុងខិតខំទាក់ទាញអ្នកវិនិយោគក្នុងស្រុក និងក្រៅស្រុក បង្កើត លិតផលទេសចរណ៍ថ្មីៗឲ្យបានច្រើន ដើម្បីបម្រើទេសចរជាតិ និងអន្តរជាតិ(ភ្នំពេញ)៖ ខណៈដែលគណៈកម្មាធិការជាតិគ្រប់គ្រង និងអភិវឌ្ឍន៍ឆ្នេរសមុទ្រកម្ពុជាបានចេញសេចក្តីប្រកាសព័ត៌មានជូនសាធារណជនពាក់ព័ន្ធនឹងក្រុមហ៊ុនអភិវឌ្ឍន៍ឆ្នេរពយកំពេញនៃខេត្តព្រះសីហនុ ទទួលបានការអនុញ្ញាតពីរាជរដ្ឋាភិបាល ដើម្បីអភិវឌ្ឍទៅជារមណីយដ្ឋានទេសចរណ៍លំដាប់ខ្ពស់មួយនោះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍គណៈកម្មាធិការជាតិគ្រប់គ្រង និងអភិវឌ្ឍឆ្នេរសមុទ្រកម្ពុជា បានថ្លែងតាមរយៈកិច្ចសម្ភាសន៍ពិសេសមួយថា រាជរដ្ឋា ភិបាលកម្ពុជាបាននិងកំពុងខិតខំបង្កើតផលិតផលទេសចរណ៍ថ្មីៗជាច្រើន ដើម្បីទាក់ទាញភ្ញៀវទេសចរឱ្យកាន់តែច្រើនបន្ថែមទៀត។
ថ្លែងនៅក្នុងកិច្ចសម្ភាសន៍ជាមួយអង្គភាពព័ត៌មាន Fresh News ប្រមុខដឹកនាំក្រសួងទេសចរណ៍ ឯកឧត្តម ថោង ខុន បានប្រាប់ឲ្យដឹងថា ការអនុញ្ញាតឲ្យវិស័យឯកជនធ្វើការវិនិយោគបង្កើតផលិតផលទេសចរណ៍ដ៏ទាក់ទាញនៅតំបន់ឆ្នេរសមុទ្រនោះគឺស្របទៅនឹងផែនការយុទ្ធសាស្ត្រអភិវឌ្ឍន៍ទេសចរណ៍២០១២ -២០២០ របស់រាជរដ្ឋាភិបាល។ រាល់ គំរោងអភិវឌ្ឍន៍ណាក៏ដោយដែលគោរព អនុវត្តតាមគោលការណ៍ណែនាំនៃការគ្រប់គ្រងឆ្នេរសមុទ្ររបស់រាជរដ្ឋាភិ បាលគួរត្រូវបានលើកទឹកចិត្ត។
នៅតំបន់សមុទ្រ ទន្ទឹមនឹងការខិតខំថែរក្សាឆ្នេរខ្សាច់ ឱ្យបានស្អាត ដើម្បីការកំសាន្តរបស់ទេសចរ និងកែសម្រួលការអភិវឌ្ឍខុសឆ្គងកន្លងមកដែលកំពុងមាន គឺជាកិច្ចការដែលគណៈកម្មាធិការជាតិគ្រប់គ្រង និងអភិវឌ្ឍឆ្នេរសមុទ្រកម្ពុជាកំពុងខិតខំធ្វើ។ព្រមជាមួយនេះ ក៏ត្រូវខិតខំសិក្សារកវិធីទាក់ទាញឲ្យមានការវិនិយោគជារមណីយដ្ឋានសម្រាកលម្ហែកម្សាន្តការកសាងឲ្យមានចំណតទូកក្តោង Marina ។ល។
ទីតាំងពយកំពេញនេះគឺសមស្របទៅនឹងផែនការយុទ្ធសាស្ត្រនេះណាស់។ តំបន់ឆ្នេរសមុទ្រកម្ពុជាដែលមាន៤ខេត្ត មានកោះជាង៦០ ឆ្នេរខ្សាច់ ឆ្នេរ ថ្មធំ ថ្មតូច ប្រវែង ៤៤០គីឡូម៉ែត្រ ក៏ពិតមែន តែកន្លែងទាំងនោះក៏នៅពុំទាន់បានអភិវឌ្ឍជាកន្លែងកម្សាន្តសម្រាប់ទេសចរទាំងអស់នៅឡើយ ដោយកន្លែងខ្លះ ពុំទាន់មានហេដ្ឋារចនាសម្ពន្ធផ្លូវថ្នល់ចូលទៅបាន។ ផ្ទុយទៅវិញ កន្លែងខ្លះមានផ្លូវចូលទៅហើយ តែពុំទាន់មានការវិនិយោគ ដែលចាំបាច់ត្រូវមានអ្នកវិនិ យោគដែលមានស្នាដៃជំនាញ និងប្រវត្តិយល់ដឹងពីការកាពារបរិស្ថានឆ្នេរសមុទ្រច្បាស់លាស់ល្អទើបអនុញ្ញាតបាន។ កន្លែងខ្លះដែលពុំមានឆ្នេរខ្សាច់ក៏ត្រូវសិក្សាបង្កើតឲ្យមានឆ្នេរខ្សាច់។ ដូចនៅខេត្តកែប ឆ្នេរខ្សាច់ដែលមាននៅក្នុង ទីក្រុងកែបបច្ចុប្បន្ន គឺមិនមែនជាឆ្នេរខ្សាច់ធម្មជាតិនោះទេ តែជាឆ្នេរខ្សាច់សិប្បនិម្មិត ដែលលោកអភិបាលក្រុងកែបក្នុងជំនាន់មុនឆ្នាំ ១៩៧០ បានយកខ្សាច់ទៅចាក់បំពេញ ដើម្បីបង្កើតឡើង (ហើយក្រោយមក យើងក៏បន្តថែរក្សាចាក់បំពេញរហូតមក) ខណៈពេលដែលឆ្នេរខ្សាច់អង្កោលដ៏វែងមានក្នុងខេត្តនេះក៏មិនទានអាចរៀបចំបាន។ដូច្នេះគោល ដៅដែលត្រូវយកចិត្តទុកដាក់ថែរក្សា និងអភិវឌ្ឍនៅតំបន់ឆ្នេរសមុទ្រមាន៣គឺ កោះ ឆ្នេរខ្សាច់ និងទីក្រុងជាប់ឆ្នេរ។ឯកឧត្តមរដ្ឋមន្ត្រីបានរំលឹកឡើងនូវទស្សនទាននៃការអភិវឌ្ឍប្រកបដោយនិរន្តរភាពមួយឃ្លាថា «អភិរក្សបម្រើឱ្យការអភិវឌ្ឍ ការអភិវឌ្ឍបម្រើឱ្យការអភិវឌ្ឍ» ដោយប្រទេសកម្ពុជាសម្បូរដោយសក្តានុពលបេតិកភណ្ឌវប្បធម៌ និងធម្មជាតិដ៏ល្អស្អាតជាច្រើនកន្លែង (ប្រាសាទបុរាណ ឆ្នេរសមុទ្រដ៏ស្រស់ស្អាត តំបន់ទេសចរណ៍ធម្មជាតិ/អេកូទេសចរណ៍ជាដើម) ដែលអាចបង្កើតជាផលិតផលទេសចរណ៍ដ៏ទាក់ទាញបានយ៉ាងច្រើន សម្រាប់បច្ចុប្បន្ន និងទៅអនាគត ហើយផលិតផលទេសចរណ៍ទាំងនោះនឹងនាំមកនូវចំណូលយ៉ាងច្រើនដល់សេដ្ឋកិច្ចជាតិ បង្កើតឱ្យយមាននូវឱកាសការងារ រួមចំណែកក្នុងការកាត់បន្ថយភាពក្រីក្រ កាត់បន្ថយចំណាកស្រុក លើកកម្ពស់ជីវភាពរស់នៅរបស់ប្រជាពលរដ្ឋ។
ដូច្នេះ រាល់គម្រោងអភិវឌ្ឍន៍លើវិស័យទេសចរណ៍ ទោះបីជានៅក្នុងកម្រិតតូច មធ្យម ធំ ឬទោះបីនៅទីកន្លែងណាក៏ដោយ ក៏ត្រូវបានគិតគូរយកចិត្តទុកដាក់ដល់ការអភិរក្សជាមុន។ ប៉ុន្តែ ការអភិរក្សមិនមែនមានន័យថាជាការរារាំងដល់ការអភិវឌ្ឍនោះទេ ខណៈដែលគម្រោងអភិវឌ្ឍន៍ទាំងឡាយនោះ តរូវបានបម្រើឱ្យការអភិរក្ស។ ជាឧទាហរណ៍ យន្តការអភិរក្សតំបន់អង្គរបច្ច្ចុប្បន្ន គឺប្រកបដោយការប្រុងប្រយ័ត្ន និងស្មារតីទទួលខុសត្រូវខ្ពស់ ក៏ដើម្បីបម្រើដល់ការអភិវឌ្ឍទេសចរណ៍ប្រកបដោយនិរន្តរភាព។វាគឺជាការអភិវឌ្ឍទេសចរណ៍មួយដែលមានការគ្រប់គ្រងច្បាស់លាស់នៅក្នុងតំបន់នេះ សំដៅបង្កើនចំនួនទេសចរ បានប្រាក់ចំណូល បង្កើតការងារ តែត្រូវធានាឱ្យបាននូវកិច្ចការពារ អភិរក្ស បេតិកភណ្ឌពិភពលោកដ៏អច្ឆរិយៈមួយនេះឲ្យបានគង់វង្សរាប់ជំនាន់កូនចៅទៅអនាគត។
សរុបទៅ នៅតំបន់សៀមរាបអង្គរ មាន៤គោលដៅដែលត្រូវយកចិត្តទុកដាក់គឺ តំបន់ប្រាសាទអង្គរ ទីក្រុងសៀមរាប តំបន់ទន្លេសាប និងតំបន់ជុំវិញ។ នៅតំបន់ជុំវិញនេះក៏ពោរពេញដោយសម្បត្តិវប្បធម៌ ធម្មជាតិ ដែលត្រូវបានរក្សាការពារដោយសហគមន៍ ប្រជាពលរដ្ឋមូលដ្ឋាន ដែលចាំបាច់ត្រូវយកចិត្តទុកដាក់ដល់ការអភិវឌ្ឍសហគមន៍នេះជាសហគមន៍ទេសចរណ៍ ដោយត្រូវបញ្ចូលសកម្មភាពទេសចរណ៍ដែលមានការទទួលខុសត្រូវនៅក្នុងសហគមន៍នេះ ដើម្បីឱ្យប្រជាពលរដ្ឋសហគមន៍បានទទួលចំណូលបន្ថែមពីសកម្មភាពទេសចរណ៍តាមរយសេវាស្នាក់នៅជាផ្ទះស្នាក់ សេវាមគ្គុទ្ទេសក៍សហគមន៍ សេវាដឹកជញ្ជូនតាមរទេះគោ រទេះសេះ កាណូតឬទូកតូចៗ សេវាម្ហួូបអាហារ ។ល។ពោលគឺត្រូវធ្វើយ៉ាងណាឱ្យប្រជាពលរដ្ឋនៅតំបន់ជុវិញបានទទួលចំណូលជាអតិបរមាពីទេសចរ។ដរាបណាប្រជាពលរដ្ឋសហគមន៍បានទទួលផលប្រយោជន៍ពីសកម្មភាពទេសចរណ៍ប្រកបដោយសមធម៌ហើយ ដរាបនោះធនធានវប្បធម៌ និងធម្មជាតិនៅតំបន់នោះពិតជានឹងត្រូវបានការពារដោយប្រជាពលរដ្ឋប្រកបដោយស្មារតីភ្ញាក់រលឹក និងការទទួលខុសត្រូវខ្ពស់។ រីឯរាជធានីភ្នំពេញជាមជ្ឈមណ្ឌលនយោបាយ សេដ្ឋកិច្ច ពាណិជ្ជកម្ម វប្បធម៌ ទេសចរណ៍ជារាជ ធានីរបស់ប្រទេសជាតិ ដែលមានទីតាំងល្អឯក ចំទន្លេចតុមុខ។ ដោយឡែក នៅតំបន់ជុំវិញរាជធានីភ្នំពេញ មានភ្នំព្រះរាជទ្រព្យជាអតីតរាជធានី និងទេសភាពសំបូរបែបតាមដងទន្លេមេគង្គប្រកបដោយភាពទាក់ទាញ។ល។ នៅតំបន់ឥសាន្ត មានសត្វផ្សោតទន្លេមេគង្គ ឯតំបន់និរតីនៃប្រទេសសុទ្ធតែពោរពេញទៅដោយសក្តានុពលទេសចរណ៍វប្បធម៌ ធម្មជាតិ និងទេសចរណ៍សហគមន៍។ ពិសេសបំផុតដែលមិនអាចកាត់ថ្លៃបាន គឺភាពញញឹម រួសរាយរាក់ទាក់ពីធម្មជាតិរបស់ប្រជាជនកម្ពុជា។ ទាំងនេះសុទ្ធតែជាសក្តានុពលទេសចរណ៍ដែលមានឧត្តមភាពប្រកួតប្រជែងនៅក្នុងតំបន់និង លើពិភពលោក។ទាំងអស់នេះគ្រាន់តែជាការរៀបរាប់ដោយសង្ខេបស្តីអំពីយុទ្ធសាស្ត្រនៃការអភិវឌ្ឍវិស័យទេស ចរណ៍កម្ពុជាយើងប៉ុណ្ណោះ។ សូមគ្រប់ភាគីពាក់ព័ន្ធ វិស័យឯកជន និងបងប្អូនប្រជាពលរដ្ឋ មេត្តាចូលរួម និងគាំទ្រ ព្រោះវិស័យទេសចរណ៍គឺជាអន្តរវិស័យ ដែលក្រសួងទេសចរណ៍តែម្នាក់មិនអាចធ្វើបានទេ។ ប៉ុន្តែ អ្វីដែលគួរចងចាំទាំងអស់គ្នា គឺការអភិរក្សមិនមែនដើម្បីរារាំងដល់ការអភិវឌ្ឍនោះទេ ដរាបណាគំរោងអភិវឌ្ឍន៍នោះបម្រើឱ្យការអភិរក្ស ដោយវិស័យទេសចរណ៍ត្រូវបានរាជរដ្ឋាភិបាលកម្ពុជាចាត់ទុកជាមាសបៃតង និងជាការនាំចេញនៅនឹងកន្លែង ដែលបានចូលរួមអភិវឌ្ឍសង្គម-សេដ្ឋកិច្ច តាមរយៈការបង្កើតប្រាក់ចំណូល បង្កើតឱកាសការងារដល់ប្រជាពលរដ្ឋ។ សូមបងប្អូនទាំងអស់មេត្តាចូលរួមក្នុងយុទ្ធនាការ និងចលនាប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ ដើម្បីឱ្យកម្ពុជាក្លាយជាគោលដៅទេសចរណ៍ស្អាត និងបៃតង។
ប្រភព: ក្រសួងទេសចរណ៍
RAC Media | ហេង សុភី
