រាជបណ្ឌិត្យសភាកម្ពុជា

«ប្រជុំស្វាគមន៍ប្រធានស្តីទីថ្មីវិទ្យាស្ថានមនុស្សសាស្រ្តនិងវិទ្យាសាស្រ្តសង្គម»

លោកបណ្ឌិត ផុន កសិកា ប្រធានស្តីទីវិទ្យាស្ថានមនុស្សសាស្ត្រនិងវិទ្យាសាស្ត្រសង្គម ឯកឧត្តម លោក លោកស្រីបណ្ឌិតជា អនុប្រធានវិទ្យាស្ថាន ជំនួយការរាជបណ្ឌិត្យសភាកម្ពុជា លេខាអចិន្ត្រៃយ៍ ប្រធាន អនុប្រធានផ្នែក មន្ត្រីទទួល បន្ទុកផ្នែក និងមន្ត្រីទាំងអស់ នៃវិទ្យាស្ថានមនុស្សសាស្រ្តនិងវិទ្យាសាស្រ្តសង្គម បានចូលរួមប្រជុំការងារវិទ្យាស្ថាន លើរបៀបវារៈស្តីពី៖

១-កិច្ចស្វាគមន៍ក្នុងនាមប្រធានវិទ្យាស្ថានស្ដីទី

២-ផែនការរៀបចំដំណើរការវិទ្យាស្ថាន

- តួនាទីរបស់លេខាអចិន្រ្តៃយ៍ជាសេនាធិការរបស់ប្រធាន

- ប្រធានផ្នែក និងមន្រ្តីត្រូវធ្វើរបាយការណ៍ប្រចាំសប្តាហ៍ ប្រចាំខែ ប្រចាំឆ្នាំ

- ការតែងតាំងតួនាទីថ្មីអាស្រ័យលើ សកម្មភាពការងារស្រាវជ្រាវ និងសីលធម៌

- ត្រូវមានសំភារៈសម្រាប់បម្រើការក្នុងការស្រាវជ្រាវដូចជា កាម៉េរ៉ាថតរូប វីដេអូ និងម៉ាស៊ីនថតសម្លេង

- ការគ្រប់គ្រងថវិកា (ប្រធានមិនកាន់ថវិកា ប៉ុន្តែជាអ្នកបញ្ជាចាយ លេខាអចិន្រ្តៃយ៍ជាអ្នកចាយ ប៉ុន្តែមិនកាន់ថវិកា) មានមន្រ្តីម្នាក់ជាបេឡាជាអ្នកទុកដាក់ថវិកា (លោក សួ ប៉ុណ្ណារ៉ាត់)។

- ការលើកទឹកចិត្តសម្រាប់អ្នកសរសេរអត្ថបទខ្លីៗប្រចាំវិទ្យាស្ថាន

៣-គោលការណ៍ផ្សេងៗសម្រាប់ដំណើរការវិទ្យាស្ថាន

កម្មវិធីនេះប្រព្រឹត្តទៅនៅថ្ងៃ ថ្ងៃពុធ ១កើត ខែមិគសិរ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២៧ ខែវិច្ឆិកា ឆ្នាំ២០១៩ វេលាម៉ោង ៩៖០០ នៅសាលប្រជុំ វិទ្យាស្ថានមនុស្សសាស្រ្តនិងវិទ្យាសាស្រ្តសង្គម រាជបណ្ឌិត្យសភា កម្ពុជា។

RAC Media

  ថ្ងៃពុធ, 27 វិច្ឆិកា 2019 ម៉ោង 11:48 AM

កិច្ចប្រជុំគណៈកម្មការនិងអនុគណៈកម្មការរៀបចំសិក្ខាសាលាស្ដីពី «ការវិវត្តនៃរចនាបថនិងសំណង់ស្ថាបត្យកម្មប្រាសាទខ្មែរ ពីសម័យឧដុង្គដល់សម័យបច្ចុប្បន្ន»

ភ្នំពេញ៖ នៅព្រឹកថ្ងៃពុធ ១កើត ខែមិគសិរ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២៧ ខែវិច្ឆិកា ឆ្នាំ២០១៩ នេះ មានកិច្ចប្រជុំរួមមួយរវាងប្រធាន អនុប្រធាន និងសមាជិកនៃគណៈកម្មការនិងអនុគណៈកម្មការរៀបចំសិក្ខាសា លាស្ដីពី «ការវិវត្តនៃរចនាបថនិងសំណង់ស្ថាបត្យកម្មប្រាសាទខ្មែរ ពីសម័យឧដុង្គដល់សម័យបច្ចុប្បន្ន» ក្រោមអធិប តីឯកឧត្ដមបណ្ឌិតសភាចារ្យ ស៊ុំ ឈុំប៊ុន នាយកមជ្ឈមណ្ឌលស្រាវជ្រាវអាស៊ីនៃរាជបណ្ឌិត្យសភាកម្ពុជា និងជាប្រធានគណៈកម្មការទទួលខុសត្រូវរួមក្នុងដំណើរការសិក្ខាសាលាខាងលើនេះ។

នៅក្នុងកិច្ចប្រជុំនាព្រឹកនេះ ឯកឧត្ដមបណ្ឌិតសភាចារ្យ បានផ្ដល់អនុសាសន៍ និងគូសបញ្ជាក់បន្ថែមអំពីតួនាទីនិងភារ កិច្ចរបស់គណៈកម្មការនិងអនុគណៈកម្មការនានាដែលទទួលភារកិច្ចក្នុងដំណើរការសិក្ខាសាលាស្ដីពី «ការវិវត្តនៃ   រចនាបថ​និងសំណង់ស្ថាបត្យកម្មប្រាសាទខ្មែរ ពីសម័យឧដុង្គដល់សម័យបច្ចុប្បន្ន» ដែលរៀបចំដោយមជ្ឈមណ្ឌលស្រាវ ជ្រាវអាស៊ីនៃរាជបណ្ឌិត្យសភាកម្ពុជា សហការជាមួយវិទ្យាស្ថានជ័យសម្រាប់ការសិក្សាជាន់ខ្ពស់ ដែលនឹងប្រព្រឹត្តទៅនៅថ្ងៃសុក្រ ៣កើត ខែមិគសិរ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២៩ ខែវិច្ឆិកា ឆ្នាំ២០១៩ វេលាម៉ោង ៨:៣០នាទីព្រឹក នៅសាលប្រជុំ «អគារឥន្ទ្រទេវី» នៃរាជបណ្ឌិត្យសភាកម្ពុជា។

ឯកឧត្ដមបណ្ឌិតសភាចារ្យ ក៏បានលើកឧទាហរណ៍បញ្ជាក់អំពីការលើកតម្លៃ ការបន្តយករចនាបថសំណង់ស្ថាបត្យកម្មប្រាសាទខ្មែរដាក់បញ្ចូលនៅក្នុងសំណង់ស្ថាបត្យកម្មធំៗនានាក្នុងសម័យទំនើបនានា ដែលមានដូចជាវិមានសន្តិភាពជា ដើម និងថ្មីៗនេះ គឺការដាក់បញ្ចូលទៅក្នុងសំណង់អគារឥន្ទ្រទេវី និងសំណង់បុស្បុករូបសំណាកព្រះនាងឥន្ទ្រទេវី នៃរាជបណ្ឌិត្យសភាកម្ពុជាផងដែរ ដែលសុទ្ធសឹងតែជាកិច្ចខិតខំប្រឹងប្រែងរបស់បញ្ញវន្តជំនាន់ក្រោយ ដើម្បីលើកកម្ពស់ការអភិរក្សនូវរចនាបថខ្មែរសម័យបុរាណ។

ឯកឧត្ដមបណ្ឌិតសភាចារ្យ ក៏បានលើកទឹកចិត្តឱ្យគណៈកម្មការ និងអនុគណៈកម្មការទាំងឡាយថា ក្រៅតែអំពីការទទួលខុសត្រូវលើតួនាទីភារកិច្ចដែលត្រូវបានបែងចែកនិងទទួល និងព្រមទាំងត្រូវបានគូសបញ្ជាក់បន្ថែមនៅថ្ងៃនេះ គប្បីត្រូវតែធ្វើការសហការគ្នាឱ្យបានជិតស្និទ្ធ និងឱ្យកាន់តែល្អប្រសើរដើម្បីឱ្យដំណើរការសិក្ខាសាលានៅថ្ងៃទី២៩ ខែវិច្ឆិកា ឆ្នាំ២០១៩ ខាងមុខនេះ ប្រព្រឹត្តទៅយ៉ាងរលូន៕

RAC Media | លឹម សុវណ្ណរិទ្ធ

  ថ្ងៃពុធ, 27 វិច្ឆិកា 2019 ម៉ោង 10:36 AM

«ជំនួបស្វែងរកឱកាសសហការរួមគ្នាលើការបណ្តុះបណ្តាល និងស្រាវជ្រាវរវាងរាជបណ្ឌិត្យសភាកម្ពុជា និងក្រុមហ៊ុនថាមពល Huaneng »

(រាជបណ្ឌិត្យសភាកម្ពុជា)៖ នារសៀលថ្ងៃទី២៦ ខែ វិច្ឆិកា ឆ្នាំ ២០១៩ ឯកឧត្តមបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា បានអញ្ជើញដឹកនាំកិច្ចប្រជុំពិភាក្សាការងារជាមួយក្រុមហ៊ុនថាមពល Huaneng ដែលជាក្រុមហ៊ុនវិនិយោគថាមពលដ៏ធំមួយរបស់សាធារណរដ្ឋប្រជាមានិតចិន ដើម្បីស្វែងរកឱកាសសហការរួមគ្នាលើការបណ្តុះបណ្តាល និងស្រាវជ្រាវរវាងរាជ បណ្ឌិត្យសភាកម្ពុជា និងក្រុមហ៊ុន។

ជំនួបពិភាក្សាការងារនេះបានប្រព្រឹត្តឡើងនៅបន្ទប់លេខ ១១ អគារឥន្ទ្រទេវី ដោយមានសមាសភាពអញ្ជើញចូលរួមឯកឧត្តមបណ្ឌិត លោកបណ្ឌិត អស់លោក លោកស្រី អ្នកនាង និងកញ្ញាភាគីរាជបណ្ឌិត្យសភាកម្ពុជា និងក្រុមហ៊ុនសរុបចំនួន ១២រូប។

ជំនួបពិភាក្សាការងារនេះ មានគោលបំណង៖

១. ស្វែងរកឱកាសសហការលើការបណ្តុះបណ្តាល និងស្រាវជ្រាវរួមគ្នារវាងរាជបណ្ឌិត្យសភាកម្ពុជា និងក្រុមហ៊ុនថាមពល Huaneng

២. ការអភិវឌ្ឍន៍វិស័យថាមពលកកើតឡើងវិញនៅប្រទេសកម្ពុជា

៣. បញ្ហាផ្សេងៗ។

ក្រោយបញ្ចប់ជំនួបពិភាក្សាការងារដែលបានប្រព្រឹត្តទៅអស់រយៈពេលប្រមាណ ២ម៉ោង ភាគីចិនបានព្រមព្រៀងធ្វើការស្រាវជ្រាវរួមគ្នាជាមួយរាជបណ្ឌិត្យសភាកម្ពុជា ដើម្បីធ្វើការស្រាវជ្រាវអំពី «ផលប៉ះពាល់សេដ្ឋកិច្ចសង្គមប្រជាជន ដែលកើតមានដោយសារការវិនិយោគសហគ្រាសចិននៅកម្ពុជា» ដើម្បីរួមចំណែកអភិវឌ្ឍន៍វិស័យថាមពលនៅក្នុងប្រទេសកម្ពុជាឱ្យមាននិរន្តរភាព៕

RAC Media 

  ថ្ងៃអង្គារ, 26 វិច្ឆិកា 2019 ម៉ោង 07:41 PM

ពិធីសម្ពោធអគារឥន្ទ្រទេវី៖ សម្ដេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន ប្រកាសផ្ដល់មន្ទីរពិសោធន៍កម្រិតស្តង់ដារមួយជូនរាជបណ្ឌិត្យសភាកម្ពុជា និងប្រគល់ភារកិច្ចសំខាន់ពីរជូនដល់រាជបណ្ឌិត្យសភាកម្ពុជា

(ភ្នំពេញ)៖ នៅក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារឥន្ទ្រទេវី នៃរាជបណ្ឌិត្យសភាកម្ពុជា នៅក្នុងឱកាសខួប២០ឆ្នាំនៃការបង្កើតរាជបណ្ឌិត្យសភាកម្ពុជា ជាមួយនឹងពិធីប្រកាសគោរមងារកិត្តិយសជូនដល់គោរមវន្តចំនួន៦រូប នាព្រឹកថ្ងៃព្រហស្បតិ៍ ១០រោច ខែកត្ដិក ឆ្នាំកុរ ឯកស័ក ព.ស. ២៥៦៣ ត្រូវថ្ងៃទី២១ ខែវិច្ឆិកា ឆ្នាំ២០១៩ នេះ សម្ដេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសយល់ព្រមតាមសំណើសុំរបស់ឯកឧត្ដមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ដែលបានស្នើសុំមន្ទីរពិសោធន៍កម្រិតស្តង់ដារមួយសម្រាប់រាជបណ្ឌិត្យសភាកម្ពុជា។ ជាមួយគ្នានេះដែរ សម្ដេចក៏បានឯកភាព ផ្ដល់ភារកិច្ចពីរដល់រាជបណ្ឌិត្យសភាកម្ពុជា ក្នុងការបកប្រែឯកសារនិងស្នាដៃស្រាវជ្រាវពីភាសាបរទេសមកជាភាសាខ្មែរ និងគម្រោងបណ្ដុះបណ្ដាលវិជ្ជាជីវៈទេសចរណ៍។

សម្ដេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសផ្ដល់ជូនដល់រាជបណ្ឌិត្យសភាកម្ពុជានូវមន្ទីរពិសោធន៍កម្រិតស្តង់ដារមួយ ដែលមានតម្លៃ ២០ម៉ឺនដុល្លារ ដល់រាជបណ្ឌិត្យសភាកម្ពុជា តាមសំណើសុំរបស់ឯកឧត្ដមបណ្ឌិតសភាចារ្យ សុខ ទូច ក្នុងគោលបំណងបម្រើជាប្រយោជន៍ដល់ការពិសោធន៍បែបវិទ្យាសាស្ត្រនានាទាំងនៅក្នុងរាជបណ្ឌិត្យសភាកម្ពុជា និងការពិសោធន៍ស្រាវជ្រាវនៅក្នុងប្រទេសកម្ពុជា។

ជាមួយគ្នានេះផងដែរ សម្ដេចតេជោប្រមុខរាជរដ្ឋាភិបាល ក៏បានសម្រេចឯកភាពនូវសំណើរបស់ឯកឧត្ដមបណ្ឌិត្យសភាចារ្យ អំពីគោលបំណង របស់រាជបណ្ឌិត្យសភាកម្ពុជាក្នុងការសុំសិទ្ធិបកប្រែឯកសារជាភាសាបរទេសទាំងឡាយមកជាភាសាខ្មែរ ដោយត្រូវមានក្រុមបកប្រែជំនាញ ដើម្បីបង្កភាពងាយស្រួលដល់សាធារណជន ពិសេសសិស្ស និស្សិត ក្នុងសិក្សាស្រាវជ្រាវឱ្យបានកាន់តែទូលំទូលាយ និងស៊ីជម្រៅបន្ថែមទៀតផងដែរ។ បន្ថែមពីលើនេះ សម្ដេចតេជោបណ្ឌិតសភាចារ្យ ក៏បានមានប្រសាសន៍ជម្រុញឱ្យរាជបណ្ឌិត្យសភាកម្ពុជា សហការជាមួយនឹងក្រសួងទេសចរណ៍ ក្នុងការបណ្ដុះបណ្ដាលជំនាញវិជ្ជាជីវៈនៅក្នុងវិស័យទេសចរណ៍។

គួរបញ្ជាក់ផងដែរថា សម្ដេចបណ្ឌិតសភាចារ្យបានជំរុញឱ្យរាជបណ្ឌិត្យសភាកម្ពុជាដែលជាធនាគារខួរក្បាលរបស់ជាតិ ត្រូវបន្តពង្រឹងការសិក្សាស្រាវជ្រាវរបស់ខ្លួនដើម្បីស្វែងធាតុចូលជូនដល់រាជរដ្ឋាភិបាល និងស្ថាប័នដែលពាក់ព័ន្ធ ហើយត្រូវធ្វើយ៉ាងណាកំណត់ឱ្យបានច្បាស់លាស់បន្តទៀតនូវការសិក្សាស្រាវជ្រាវណាដែលចាំបាច់និងបន្ទាន់ ដោយត្រូវសហការឱ្យបានជិតស្និទ្ធជាមួយនឹងស្ថាប័នដែលអនុវត្ត ដើម្បីឱ្យលទ្ធផលនៃការសិក្សាស្រាវជ្រាវ អាចយកទៅអនុវត្តបាន៕

RAC Media | លឹម សុវណ្ណរិទ្ធ

  ថ្ងៃសុក្រ, 22 វិច្ឆិកា 2019 ម៉ោង 02:48 PM

សម្ដេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន អញ្ជើញប្រកាសគោរមងារនៃរាជបណ្ឌិត្យសភាកម្ពុជា ជូនដល់គោរមវន្ត ៦ រូប

(រាជបណ្ឌិត្យសភាកម្ពុជា)៖ នៅព្រឹកថ្ងៃព្រហស្បតិ៍ ១០រោច ខែកត្ដិក ឆ្នាំកុរ ឯកស័ក ព.ស. ២៥៦៣ ត្រូវថ្ងៃទី២១ ខែវិច្ឆិកា ឆ្នាំ២០១៩ នេះ សម្ដេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្ដល់កិត្តិយសដ៏ខ្ពង់ខ្ពស់ អញ្ជើញប្រកាសនិងបំពាក់អាវ គោរមងារនៃរាជបណ្ឌិត្យសភាកម្ពុជាជូនដល់គោរមវន្ត ៦រូប។

គោរមវន្តទាំង ៦រូប ដែលត្រូវប្រកាសនិងបំពាក់អាវនាព្រឹកនេះ សុទ្ធសឹងជាឥស្សរជននិងបញ្ញវន្តជាន់ខ្ពស់របស់កម្ពុជា ដែលមានលក្ខណៈសម្បត្តិនិងស្នាដៃយ៉ាងល្អវិសេសចំពោះជាតិ និងត្រូវបាន ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជាប្រោសព្រះរាជទាននូវ គោរមងារកិត្តិយសនៃរាជបណ្ឌិត្យសភាកម្ពុជា នាពេលថ្មីៗកន្លងមកនេះ។

គួរបញ្ជាក់ផងដែរថា ឥស្សរជននិងបញ្ញវន្តជាន់ខ្ពស់ដែលបានទទួលគោរមងារទាំង ៦រូបមាន ១. ឯកឧត្ដម ឆាយ ថន ទទួលគោរមងារជា កិតិ្តសេដ្ឋាបណ្ឌិត, ២. លោកជំទាវ ឃួន សុដារី ទទួលគោរមងារជា កិតិ្តសង្គហបណ្ឌិត, ៣. ឯកឧត្ដម ឌិត មន្ទី ទទួលគោរមងារជា កិត្តិនីតិកោសលបណ្ឌិត, ៤. ឯកឧត្ដម ប៉ែន បញ្ញា ទទួលគោរមងារជា កិត្តិនីតិកោសលបណ្ឌិត, ៥. ឯកឧត្ដម ជាម យៀប ទទួលគោរមងារជា កិតិ្តសេដ្ឋាបណ្ឌិត, ៦. ឯកឧត្ដម អ៉ឹម ឈុនលឹម ទទួលគោរមងារជាកិត្តិនីតិកោសលបណ្ឌិត៕

RAC Media | លឹម សុវណ្ណរិទ្ធ

  ថ្ងៃសុក្រ, 22 វិច្ឆិកា 2019 ម៉ោង 02:25 PM

សម្ដេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន អញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការអគារឥន្ទ្រទេវី នៃរាជបណ្ឌិត្យសភាកម្ពុជា

ភ្នំពេញ៖ នៅព្រឹកថ្ងៃព្រហស្បតិ៍ ១០រោច ខែកត្ដិក ឆ្នាំកុរ ឯកស័ក ព.ស. ២៥៦៣ ត្រូវថ្ងៃទី២១ ខែវិច្ឆិកា ឆ្នាំ២០១៩ នេះ សម្ដេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្ដល់កិត្តិយសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារឥន្ទ្រទេវី នៃរាជ បណ្ឌិត្យ សភាកម្ពុជា នៅក្នុងឱកាសខួប២០ឆ្នាំនៃការបង្កើតរាជបណ្ឌិត្យសភាកម្ពុជា ជាមួយនឹងពិធីប្រកាសគោរមងារ កិត្តិយស ជូនដល់គោរមវន្តចំនួន៦រូប ព្រមទាំងប្រគល់សញ្ញាបត្រកិត្តិបណ្ឌិតជូនឥស្សរជន៣រូប និងប្រគល់សញ្ញាបត្រ ជូន ជ័យលាភីថ្នាក់បណ្ឌិតនិងថ្នាក់បរិញ្ញាបត្រជាន់ខ្ពស់នៃរាជបណ្ឌិត្យសភាកម្ពុជាសរុបចំនួន១១រូប។

អគារសិក្សាដែលមានកម្ពស់បីជាន់ ស្មើនឹង ១៨ម៉ែត្រ មានបណ្ដោយប្រវែង៤០ម៉ែត្រ ទទឹង ១៧ម៉ែត្រ នេះ ត្រូវបានចាប់ផ្តើមបុកគ្រឹះសាងសង់នៅថ្ងៃទី ២៦ ខែសីហា ឆ្នាំ២០១៨ និងត្រូវបានសម្ពោធដាក់ឱ្យប្រើប្រាស់ជាផ្លូវការនៅថ្ងៃទី២១ ខែវិច្ឆិកា ឆ្នាំ២០១៩ នេះ នឹងត្រូវបានប្រើប្រាស់ដើម្បីបម្រើដល់ការបណ្ដុះបណ្ដាលក្រោយឧត្ដមសិក្សា ព្រមទាំងជាមជ្ឈមណ្ឌលបកប្រែភាសាបរទេស និង ជាកន្លែងស្រាវជ្រាវ ប្រមូលផ្តុំបញ្ញវន្ត តាមរយៈការរៀបចំសិក្ខាសាលា សន្និសីទ និង កម្មវិធីកិច្ចពិភាក្សាតុមូលផ្សេងៗរបស់រាជបណ្ឌិត្យសភាកម្ពុជា។

នៅក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារឥន្ទ្រទេវី នៃរាជបណ្ឌិត្យសភាកម្ពុជានាព្រឹកនេះដែរ សម្ដេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន ក៏បានសម្រេចឯកភាពនូវសំណើរបស់ឯកឧត្ដមបណ្ឌិត្យសភាចារ្យ ដែលបានលើកឡើងអំពីគោលបំណង របស់រាជបណ្ឌិត្យសភាកម្ពុជាក្នុងការសុំសិទ្ធិបកប្រែឯកសារជាភាសាបរទេសទាំងឡាយមកជាភាសាខ្មែរ ដោយត្រូវមានក្រុមបកប្រែជំនាញ ដើម្បីបង្កភាពងាយស្រួលដល់សាធារណជន ពិសេសសិស្ស និស្សិត ក្នុងសិក្សាស្រាវជ្រាវឱ្យបានកាន់តែទូលំទូលាយ និងស៊ីជម្រៅបន្ថែមទៀត។ លើសពីនេះទៅទៀត សម្ដេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន ក៏បានប្រកាសផ្ដល់ជូនដល់រាជបណ្ឌិត្យសភាកម្ពុជានូវមន្ទីរពិសោធន៍កម្រិតស្តង់ដារមួយ ដែលមានតម្លៃ ២០ម៉ឺនដុល្លារ ដល់រាជបណ្ឌិត្យសភាកម្ពុជា សម្រាប់បម្រើជាប្រយោជន៍ដល់ការពិសោធន៍បែបវិទ្យាសាស្ត្រនានាផងដែរ។

គួរបញ្ជាក់ផងដែរថា អគារឥន្ទ្រទេវី គឺជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ផ្ដល់ជូនដល់រាជបណ្ឌិត្យសភាកម្ពុជា តាមរយៈអ្នកឧកញ៉ា ពុង ឃាវសែ ដែលថវិកាចំណាយក្នុងការសាងសង់ មានទឹកប្រាក់ចំនួន ១,៥៤៦,៩៤៤.៣០ដុល្លារ៕

RAC Media | លឹម សុវណ្ណរិទ្ធ

ប្រភពរូបថត៖  SPM Page 21/11/2019

  ថ្ងៃសុក្រ, 22 វិច្ឆិកា 2019 ម៉ោង 01:38 PM

រាជបណ្ឌិត្យសភាកម្ពុជា និងក្រសួងទេសចរណ៍នឹងសហការគ្នាលើការបណ្តុះបណ្តាល និងស្រាវជ្រាវចំនួន ៤ចំណុច ដើម្បីលើកកម្ពស់វិស័យទេសចរណ៍នៅកម្ពុជា

(ភ្នំពេញ)៖ នាថ្ងៃទី២០ ខែវិច្ឆិកា ឆ្នាំ២០១៩ ម៉ោង៤:០០នាទីរសៀល ឯកឧត្តមបណ្ឌិត្យសភាចារ្យ​ សុខ ទូច ប្រធានរាជបណ្ឌិត្យសភាកម្ពុជា និងឯកឧត្តម ថោង ខុន រដ្ឋមន្រ្តីក្រសួងទេសចរណ៍បានជួបប្រជុំពិភាក្សាគ្នា នៅទីស្តីការក្រសួងទេសចរណ៍។

ដើម្បីលើកកម្ពស់វិស័យទេសចរណ៍នៅកម្ពុជាឱ្យកាន់តែប្រសើរឡើង ភាគីទាំងពីរបានឯកភាពគ្នាសហការលើចំណុច៤ (បួន)៖

១) រៀបចំប្រព័ន្ធផ្សព្វផ្សាយតាមគ្រប់រូបភាព សំខាន់គឺប្រព័ន្ធឌីជីថល

២) ការរៀបចំការបណ្តុះបណ្តាលជំនាញវិជ្ជាជីវៈ ដល់អ្នកបម្រើសេវាកម្មទេសចរណ៍ទាំងពីរ ការធ្វើបដិសណ្ឋារកិច្ច ម្ហូបអាហារ និងការស្នាក់នៅ

៣) ការរៀបចំផែនទីទីតាំងរមណីយដ្ឋាន និងប្រាសាទនានា និង

៤) ការរៀបចំសៀវភៅផ្នត់ស្តីពី ទេសចរណ៍នៅកម្ពុជា

ជាទីបញ្ចប់ រាជបណ្ឌិត្យសភាកម្ពុជា និងក្រសួងទេសចរណ៍បានឯកភាពគ្នារៀបចំផែនការ យុទ្ធសាស្រ្ត សម្រាប់អភិវឌ្ឍន៍វិស័យទេសចរណ៍។

កិច្ចប្រជុំបានបញ្ចប់នៅម៉ោង ៥៖៤៥នាទីរសៀលក្នុងថ្ងៃខែឆ្នាំដដែល ដោយបរិយាកាសរីករាយ និង ជោគជ័យ៕

RAC Media

  ថ្ងៃពុធ, 20 វិច្ឆិកា 2019 ម៉ោង 07:42 PM

«ឯកឧត្តមបណ្ឌិតសភាចារ្យ សុខ ទូច និងអ្នកឧកញ៉ាកិត្តិបណ្ឌិត ពុង ឃាវសែ អញ្ជើញត្រួតពិនិត្យអគារ ឥន្ទ្រទេវី»

(រាជបណ្ឌិត្យសភាកម្ពុជា)៖ នារសៀល ថ្ងៃទី២០ ខែវិច្ឆិកា ឆ្នាំ២០១៩នេះ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានជួបជាមួយអ្នកឧកញ៉ាកិត្តិបណ្ឌិត ពុង ឃាវសែ និងសហការី ដើម្បីអញ្ជើញត្រួតពិនិត្យអគារឥន្ទ្រទេវីទាំងមូលដែលនឹងត្រូវដាក់សម្ពោធដាក់ឱ្យប្រើប្រាស់ជាផ្លូវការ នាព្រឹកថ្ងៃទី២១ ខែវិច្ឆិកា ឆ្នាំ២០១៩ស្អែកនេះ ក្រោមអធិបតីភាពដ៏ខ្ពង់ខ្ពស់សម្តេចតេជោបណ្ឌិតសភាចារ្យ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

គោលបំណងនៃការសាងសង់អគារនេះឡើង គឺដើម្បីបំពេញតម្រូវការនៃការរីកចម្រើនរបស់រាជបណ្ឌិត្យសភាកម្ពុជា លើបីចំណុច សំខាន់៖ ទី១. ជាកន្លែងបណ្តុះបណ្តាលនិស្សិតថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតផ្នែកភាសាចិន, ទី២. ជាមជ្ឈមណ្ឌលបកប្រែភាសាបរទេស (ជាទិសដៅនាពេលអនាគត) រាជបណ្ឌិត្យសភាកម្ពុជាមានបំណងប្រមូលផ្តុំអ្នកមានចំណេះដឹងខាងភាសាផ្សេងៗ ហើយសុំសិទ្ធិធ្វើការបកប្រែនូវរាល់ស្នាដៃ ឬផលិតផលដែលមានតម្លៃសម្រាប់ជាតិមកជាខេមរភាសា) និងទី៣. ជាកន្លែងស្រាវជ្រាវ ប្រមូលផ្តុំបញ្ញវន្ត សិក្ខាសាលា ហើយជាទិសដៅចំពោះមុខ អគារនេះក៏អាចបង្កើតជាតុមូលសម្រាប់បញ្ញវន្តធ្វើការវិភាគពីបញ្ហាសង្គម នយោបាយ សេដ្ឋកិច្ច បច្ចេកវិទ្យាទំនើបៗរបស់ពិភពលោកថ្មីៗនេះផងដែរ។ ជារួម អគារនេះនឹងជាទីបម្រើដល់បញ្ញវន្តទាំងខាងផ្នែកវិទ្យាសាស្រ្តពិត និងវិទ្យាសាស្រ្តសង្គម ដើម្បីឱ្យបញ្ញវន្តទាំងឡាយបានបញ្ចេញស្នាដៃរបស់ខ្លួនសម្រាប់ការរួមចំណែកក្នុងការអភិវឌ្ឍសង្គមជាតិ៕

សូមជម្រាបជូនថា អគារឥន្ទ្រទេវី ជាអំណោយដ៏ថ្លៃថ្លាបំផុតរបស់សម្តេចតេជោបណ្ឌិតសភាចារ្យ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈអ្នកឧកញ៉ា ពុង ឃាវសែ ត្រូវបានសាងសង់រួចរាល់ហើយ នឹងត្រូវដាក់សម្ពោធឱ្យប្រើប្រាស់ ជាផ្លូវការ នៅថ្ងៃ២១ ខែវិច្ឆិកា ឆ្នាំ២០១៩ខាងមុខនេះ។

RAC Media

  ថ្ងៃពុធ, 20 វិច្ឆិកា 2019 ម៉ោង 04:53 PM

«រាជបណ្ឌិត្យសភាកម្ពុជានឹងសហការជាមួយក្រសួងសេដ្ឋកិច្ច និងហិរញ្ញវត្ថុស្រាវជ្រាវលើគម្រោងឌីជីថលូបនីយកម្មនៃភាសាខ្មែរ»

(រាជបណ្ឌិត្យសភាកម្ពុជា)៖ ដោយសារបច្ចេកវិទ្យាព័ត៌មាន និងទំនាក់ទំនងមានភាពចាំបាច់សម្រាប់ការអភិវឌ្ឍប្រទេសជាតិប្រកបដោយនិរន្តរភាព រាជបណ្ឌិត្យសភាកម្ពុជានឹងសហការជាមួយក្រសួងសេដ្ឋកិច្ច និងហិរញ្ញវត្ថុស្រាវជ្រាវលើគម្រោងឌីជីថលូបនីយកម្មនៃភាសាខ្មែរ (Digitization of the Khmer language Processing) ក្រោមការផ្តួចផ្តើមគំនិតរបស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា។

នៅក្នុងជំនួបពិភាក្សានារសៀល ថ្ងៃទី១៩ ខែវិច្ឆិកា ឆ្នាំ២០១៩នេះ ឯកឧត្តម គង់ ម៉ារី ទីប្រឹក្សារបស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងមន្ត្រីជំនាញ ៦រូបទៀតរបស់ក្រសួងសេដ្ឋកិច្ច និងហិរញ្ញវត្ថុ បានអញ្ជើញមកជួបឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងសហការី ដើម្បីពិភាក្សាអំពី លទ្ធភាពក្នុងការរៀបចំបង្កើតគម្រោងឌីជីថលូបនីយកម្មនៃភាសាខ្មែរ (Digitization of the Khmer language Processing)។

នៅកិច្ចប្រជុំដែលបានរៀបចំឡើងនៅក្នុងសាលប្រជុំស្លឹករឹតរាជបណ្ឌិត្យសភាកម្ពុជា នាឱកាសនេះ ឯកឧត្តម គង់ ម៉ារី បានស្នើឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាចំនួន ៥ចំណុច រួមមាន៖ ១. ផ្តល់បច្ចេកទេសជាភាសាខ្មែរ ២.ប្រមូលទិន្នន័យទាក់ទងនឹងភាសាខ្មែរ ៣.រៀបចំសទ្ទានុក្រម (Lexicon) ៤.រៀបចំ Corpus និង៥. សាកល្បងលើ Prototype។

នៅក្នុងឱកាសនេះ ឯកឧត្តម គង់ ម៉ារី និងមន្ត្រីជំនាញក្រសួងសេដ្ឋកិច្ច និងហិរញ្ញវត្ថុបានរៀបចំធ្វើបទបង្ហាញជូនឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងសហការីអំពី ដំណើរការរៀបចំគម្រោង និងសមិទ្ធផលស្រាវជ្រាវ កន្លងមកផងដែរ។

ជាការឆ្លើយតប ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានថ្លែងអំណរគុណជូនឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ដែលបានផ្តួចផ្តើមគំនិតសា្រវជ្រាវលើវិស័យបច្ចេកវិទ្យាព័ត៌មាននេះ ដើម្បីពង្រឹង និងពង្រីកវិស័យវិទ្យាសាស្ត្រ និងការអភិវឌ្ឍបច្ចេកវិទ្យាព័ត៌មានឱ្យកាន់តែមានភាពងាយស្រួល និងទំនើប សម្រាប់ប្រើប្រាស់ទៅថ្ងៃអនាគត។

ជាមួយនេះ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានស្នើឱ្យមន្ត្រីជំនាញស្ថាប័នទាំងពីរសហការធ្វើការរួមគ្នាបន្តទៀតទៅថ្ងៃអនាគត ដើម្បីឱ្យគម្រោងនេះសម្រេចបានសមិទ្ធផលល្អប្រសើរ។

ជាទីបញ្ចប់ មន្ត្រីជំនាញរាជបណ្ឌិត្យសភាកម្ពុជានិងមន្ត្រីជំនាញបច្ចេកវិទ្យាព័ត៌មានក្រសួងសេដ្ឋកិច្ច និងហិរញ្ញវត្ថុ នឹងធ្វើការរួមគ្នារៀបចំស្រាវជ្រាវគម្រោងឌីជីថលូបនីយកម្មនៃភាសាខ្មែរ ដើម្បីបំប្លែងឯកសារនានាដែលធ្វើឱ្យវិស័យបច្ចេកវិទ្យាព័ត៌មានមានភាពងាយស្រួលប្រើប្រាស់ រក្សាទុក និងចែកចាយលើប្រព័ន្ធអ៊ីនធឺណិតឱ្យកាន់តែទូលំទូលាយជាងមុន៕

RAC Media 

  ថ្ងៃអង្គារ, 19 វិច្ឆិកា 2019 ម៉ោង 07:20 PM

«ពិធីសូធ្យមន្តចម្រើនព្រះបរិត្ត លើករាសី អគារឥន្ទ្រទេវី និងអភិសេកបដិមាព្រះនាងឥន្ទ្រទេវី»

(រាជបណ្ឌិត្យសភាកម្ពុជា)៖ នៅព្រឹកថ្ងៃចន្ទ ៧រោច ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៨ ខែវិច្ឆិកា ឆ្នាំ២០១៩ ថ្នាក់ដឹកនាំ និងមន្ត្រីរាជការនៃរាជបណ្ឌិត្យសភាកម្ពុជា និងភ្ញៀវកិត្តិយស បានរៀបចំប្រារព្ធពិធីសូធ្យមន្តចម្រើនព្រះបរិត្ត លើករាសី អគារឥន្ទ្រទេវី និងអភិសេកបដិមាព្រះនាងឥន្ទ្រទេវី ក្រោមអធិបតីភាពឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងលោកជំទាវឧកញ៉ា សៀង ចាន់ហេង អគ្គនាយិកាក្រុមហ៊ុន ហេង អភិវឌ្ឍន៍ និងសមាសភាពអញ្ជើញចូលរួមឯកឧត្តមបណ្ឌិតសភាចារ្យ ឯកឧត្តម លោកជំទាវ សាស្ត្រាចារ្យ បណ្ឌិត អស់លោក លោកស្រី អ្នកនាង និងកញ្ញា ដែលជាថ្នាក់ដឹកនាំ និងមន្ត្រីរាជការនៃរាជបណ្ឌិត្យសភាកម្ពុជា ព្រមទាំងភ្ញៀវកិត្តិយសសរុបចំនួនប្រមាណ ១០០រូប។

នៅក្នុងពិធីតាមបែបសាសនា ព្រះសង្ឃចំនួន ៩អង្គបានសូធ្យមន្តចម្រើនព្រះបរិត្ត និងប្រោះព្រំលើករាសីនៅសំណង់បុស្បុក បដិមាព្រះនាងឥន្ទ្រទេវី និងនៅអគារឥន្ទ្រទេវី។

សូមជម្រាបជូនថា អគារឥន្ទ្រទេវី ជាអំណោយដ៏ថ្លៃថ្លាបំផុតរបស់សម្តេចតេជោបណ្ឌិតសភាចារ្យ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈលោកឧកញ៉ា ពុង ឃាងសែ ត្រូវបានសាងសង់រួចរាល់ហើយ នឹងត្រូវដាក់សម្ពោធឱ្យប្រើប្រាស់ ជាផ្លូវការ នៅថ្ងៃ២១ ខែវិច្ឆិកា ឆ្នាំ២០១៩ខាងមុខនេះ។

ក្រោមការដឹកនាំប្រកបដោយចក្ខុវិស័យវែងទ្រឹស្តីផ្សារចងភ្ជាប់ជាមួយការអនុវត្តហើយត្រូវមានលទ្ធផល និងក្រមសីលធម៌វិជ្ជាជីវៈរបស់ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា គោលបំណងនៃការសាងសង់អគារនេះឡើង គឺដើម្បីបំពេញតម្រូវការនៃការរីកចម្រើនរបស់រាជបណ្ឌិត្យសភាកម្ពុជា លើបីចំណុច សំខាន់៖ ទី១. ជាកន្លែងបណ្តុះបណ្តាលនិស្សិតថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតផ្នែកភាសាចិន, ទី២. ជាមជ្ឈមណ្ឌលបកប្រែភាសាបរទេស (ជាទិសដៅនាពេលអនាគត) រាជបណ្ឌិត្យសភាកម្ពុជាមានបំណងប្រមូលផ្តុំអ្នកមានចំណេះដឹងខាងភាសាផ្សេងៗ ហើយសុំសិទ្ធិធ្វើការបកប្រែនូវរាល់ស្នាដៃ ឬផលិតផលដែលមានតម្លៃសម្រាប់ជាតិមកជាខេមរភាសា) និងទី៣. ជាកន្លែងស្រាវជ្រាវ ប្រមូលផ្តុំបញ្ញវន្ត សិក្ខាសាលា ហើយជាទិសដៅចំពោះមុខ អគារនេះក៏អាចបង្កើតជាតុមូលសម្រាប់បញ្ញវន្តធ្វើការវិភាគពីបញ្ហាសង្គម នយោបាយ សេដ្ឋកិច្ច បច្ចេកវិទ្យាទំនើបៗរបស់ពិភពលោកថ្មីៗនេះផងដែរ។ ជារួម អគារនេះនឹងជាទីបម្រើដល់បញ្ញវន្តទាំងខាងផ្នែកវិទ្យាសាស្រ្តពិត និងវិទ្យាសាស្រ្តសង្គម ដើម្បីឱ្យបញ្ញវន្តទាំងឡាយបានបញ្ចេញស្នាដៃរបស់ខ្លួនសម្រាប់ការរួមចំណែកក្នុងការអភិវឌ្ឍសង្គមជាតិ។

កាលពីមុន អគារនេះ (អគារA) ដែលមានកម្ពស់ត្រឹមតែមួយជាន់ត្រូវបានផ្លាស់ប្តូរទម្រង់ថ្មីមួយទៀតទៅជាអគារ ឥន្ទ្រទេវី ដែលមានកម្ពស់បីជាន់ មានលក្ខណៈកាន់តែទំនើប ដោយត្រូវបានបំពាក់បិរក្ខារប្រកបដោយផាសុកភាព និងកាន់តែមានសោភ័ណភាព សក្តិសមជាកន្លែងបណ្តុះបណ្តាលកម្រិតស្តង់ដារខ្ពស់សម្រាប់ជាតិដែលបម្រើលើវិស័យច្រើន ជាពិសេសគឺ ទាក់ទងនឹងការងារបណ្តុះបណ្តាលផ្សេងៗ។ អគារឥន្ទ្រទេវីនេះ មានកន្លែងដែលរៀបចំកម្មវិធីសម្រាប់អ្នកចូលរួមប្រមាណជាង ៤០០នាក់ ដែលកន្លងមករហូតដល់ពេលបច្ចុប្បន្ន រាជបណ្ឌិត្យសភាកម្ពុជាមិនទាន់មានទីកន្លែងសម្រាប់រៀបចំកម្មវិធីនានាដែលអាចទទួលអ្នកចូលរួមបានលើសពី ២០០នាក់នៅឡើយទេ។

ជាមួយនេះ បដិមាព្រះនាង ឥន្ទ្រទេវី ជាលើកដំបូងដែលត្រូវបានសិតនៅក្នុងបរិវេណអគារឥន្ទ្រទេវីនេះ គឺសិតឡើងអំពី ស្ពាន់ មានកម្ពស់ ១,៥៧ម៉ែត្រ គិតពីបាតជើងដល់ព្រះសិរ និងទំហំដងខ្លួនមានសមាមាត្រទៅនឹងរូបចម្លាក់ជាក់ស្តែងដែលឆ្លាក់នៅប្រាសាទព្រះខ័ន។ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងសហការីបានសម្រេចសាងសង់បដិមាព្រះនាងឥន្ទ្រទេវី ជានិមិត្តរូបតម្កល់នៅក្នុងបរិវេណអគារ ដើម្បីជាការរម្លឹកឱ្យកូនខ្មែរជំនាន់ក្រោយចងចាំពីរូបភាពគំរូនារីខ្មែរសម័យអង្គរដែលបានជួយដល់ប្រទេសជាតិជាច្រើន ជាពិសេសក្នុងវិស័យអប់រំ។

បដិមានេះទទួលបានជំនួយឧបត្ថម្ភពីលោកជំទាវឧកញ៉ា សៀង ចាន់ហេង នាយិកាក្រុមហ៊ុន ហេង អភិវឌ្ឍន៍៕

RAC Media

  ថ្ងៃចន្ទ, 18 វិច្ឆិកា 2019 ម៉ោង 12:51 PM